الحر بالغمزة ...

الحر بالغمزة ...
اللسان فيه وفيه
محمد صولة
Sawla.mohamed@hotmail.com

الليل ياليل

واحد اللسان – عفوا - قصدت
واحد الليلة قلت نعست حتى طاب نعاسي
وانا نحلم واحد الحلمة
شفت فيها رجليا مقلشين لفوق ولتحت راسي
وباركين علي لكمة ورا لكمة
قلت ماكاين باس ياك غير اهلي وناسي
ساعة هما من ديك الحومة
شحال وانا تنقول هذا اسباب تفلاسي
ماحينتي متمادي وانا في اللومة
بكيت بزاف على الدنيا الغرارة وزايد نقاسي
ياك اللي بغاها لقاها واخا مذمومة
شكون قال هذا الكلام فتقواسي
مهمومة ياالعربي مهمومة

الحساب صابون

غادي جافل
بحال الواد اللي طاج بلا اخبار اماليه
كاحش حب وتبن واللي داز عليه
لاحس الخارج والداخل وكل ماقدام عينيه
ياربي تعطينا اصبر اهنا ولهيه
يمكن الوقت يحلى وتزهى الدنيا بين يديه
شفتو أنا علاش تنغوت باش نوريه
كيف يعيق هذا البريق ويطوالو رجليه
ويزيد فيه بلا قياس البراد ومافيه
غير انا نغمغم وهو يفهم تواليه
ياك الدار واسعة والكلمة منو تكسيه
واقيلة طاح الحك فالما وتعرى الطاس من رعاويه

التفرتيت

فتحت كتاب ولقيت فيه كلام عامر بالوش والزفوط ماتليت راضي على راسي اللي مابغى يجرب شي حوايج من هذا شحال وانا تنقول يمكن نوصل ليها بلا تعوريط لحقاش اللي فيدو القنبة تيخاف من الحنش هذا اللي دخل بلا ما يعاود يخرج من غارو رقد فيه بمرة وأخرها خلى جلدو وامشى جهد عبار واد بهت لما تيفيض تيولي بحال الغول اللي عندو سبع ريوس أو السبع بو بطاين ياك الشتا طايحة والخير جاي وعلاش عليك بهاذا البكا يا الدرية لما تخرجي من داركم هاأنا نتسناك ونوصلك لميمونك بلا شطون بلا مرقة وبلا خبز حتى هو يمكن وصلاتو النوبة غادي يخرج من قاعتو ويولي ما عندو كسار في الربح او الخطية ماتليت قاد على هزان كلام يتوزن بالنفط هذا ليام كلشي دخل لجواه وكلش ولى عندو بحال بحال.

فلاشات

الطريق غبرا والحر شتا
بنادم تالف مع رجليه يمكن يطيحوه
من حفرة لحفرة ومن قهوة لقهوة
إيلا بغيتي تنزه عليك بالصبر في دارك
جالس فكرسي وقدامك شلى ما يتقال
ماتشوف بلسانك
ماتهضر بعينيك
وشحال قدك تاكل بجنابك.
....
واش رايبة رايبة وكلها ياخد عمود
أوهاهي على عينيك يا بن عدي.
....
لا تسولوها على نهار خرجات من دار اباها
لا توريوها فين جات دار القايد السي احمد بو تارازا
وفين هي كازا وايت باها
وفين ما بغات هي تلقاه مع خليلتو يتباهى.
....
تبقى الكلاب وحدها الوفية.
....
حطيتها تبرد وطاروا بيها سخونة.
....
يموت الزمار وأصابعه ترقص.
....
ياكل مع الذيب ويبكي مع السارح.
....

بعد 8 مارس العظيم

إلى كانت خطبتها بالمخاصمة عرسها يقدر يدوز بالمراجمة.
هذا ما جنته براقش على أهلها.
تحزمات القرعة بالفقوس وقالت ليه تعالى نقطعو الواد.
ديرها فالرجال ونساها وديرها فالنسا وتسناها.
حبل الكذب قصير.

قفلة فمحلها النيت

عندما تأكد من لحظة نهايته،
أزال عن جسده لباس الحياة، وقصد مكان تطهيره،
لكنه فوجئ بلافتة كتب عليها بخطوط غير واضحة جدامايلي:
يلزم كل عائلة شراء الكفن قبل المجيءإلى مستودع الأموات،
لم يبك ، ضحك كعادته ، وقال: إذا كان رب البيت للدف ضاربا
فشيمة أهل البيت الرقص.

التجرجيرة

أنا كنعرف العجينة اللي فكرش كل واحد،
وغادي يجي الوقت اللي نخرجها ليهم،
ياك الحيلة تغلب العار،
قال البوهالي سيدي المجذوب:
اللي موسطاشو من الحلفة مايصوط على عافية
واللي غلب يعف
وماشي اللي حرث الجمل دكو
وسيري يا دجاجة حتى ....