الحر بالغمزة ... تبهلة خرافة البوهالي

الحر بالغمزة ...
تبهلة خرافة البوهالي
Sawla.mohamed@hotmail.com
شديت الطريق وقلت هذي هي اللي بغيت
لقيت راسي وسط ميات لوية وحدورة وحافة
قلت نبرك بحالي بحال الناس حتى نشوف قدامي
ساعة اللي احصل كان كلو كذوب و خرافة
ناس تيهدرو فكل شي
ناس تياكلوعرق بنادم
ناس خف من الفرشي
ناس قولهم وفعلهم تقادم
ناس من عيوبهم مخزونين فبزاطم
ناس باعو وشراو وخلاو بعضين تتزاحم
ناس قلبو الفستة بقرعة ماتطيح في اندم
ناس وعلاش عليك بدات تخمم
في الباب اللي يجي منو الهوا تسدو وتكتم
لحقاش ماعندها ما تربح وماتخسر غير الهم
هو اللي ولى ليوم عند بعض الفهايمية يترجم
ها أنا ليوم قلت كلامي المرصع في الميزان
وهاهما صارو ينعتوني بالبوهالي ولد حديدان
واحد
واقف على رجليه
زوج
عندو رجل وحدة والثانية خشبة
ثلاثة
زادوه رجل من الحديد
أربعة
ولى حاشا اسيادي بهمة
خمسة
ماتلى ينفعو غير لسانو باعو بعضة في الما
ياويل من سرج خيلو بالوهم
واركب على والو
...........
واحد المرة حكى لي صاحبي وقال:
كان تيجي لعندو
وتيتعاطى معاه
فكل شي من هذاك اللي على بال كل وحد منا
كان تيبغي يبين باللي راه فاهم وعايق اكثر من القياس
ساعة ليوم ولى يمسح بعينيه الوقت وينشف رجليه المثلوجة
كل ما تيحمل بين يديه غير الريح والغبرا
وهذاك الظلام اللي عساس عليه
آش هذا تبهلة
ولى يعرف يهدر
ويقرا ويكتب
واش بعدة عندو الشهادة
شحال منهم تصنع ليه كرسي
وهو بحال عروسة ماعارفة فين ترسي
تيبصم على الحلال والحرام
من كثرة الشطون
تخلط ليه الدم بالعرام
وباع ذاتو وتسالى ليه الكلام
وبدا على الشطيح والزديح
وتزيار أو حلان الحزام
ياك ما دار يدو في العصيدة
وما حس بوالو
ياك ما نفخ على الرماد
وما لقى غير حثالو
..........
الراديو تيتحرك بالما
والتلفازة موس
الجورنال واقف على الكلمة
ولانترنيت عتروس
هاك اللي بغيتي من عندي
وآرا الحريرة والتمر والشباكية
راه تيطل وباغي يقول شي حاجة
افتح ليه الباب وخليه يكمل كلامو
يمكن يكون فيه ومنو الطايلة
..........
تشهيت نقول كلام بحال الليل
بحال الشجرة لما تتنضج وتعطي الظل
بحال السما كتبان قريبة لما نبغيها
والشمس لما تتخزن ورا السحاب
وتتشير لي بمنديل من الظلمة
ماقريت غيرحساب الهتوف
مامشيت غير بالصفوف
ماشطحت غير على الدفوف
ماطلبت غير بالكفوف
ماحاربت غير بالسيوف
واش إيلا بغى المكفوف
يشوف بيديه
لازم ليه من عصا توريه
احسب شحال باقي لي
احسب لي وانا نجمع ليك الباقي
احسب قبل ما يتسالى العد
احسب كل الداخل والخارج
احسب واللي رابح ليوم
يمكن يكون غدة خاسر
والخاسر فهذا الوقت رابح
رابح بسكاتو
وفسكاتو حكمة
ما تيعرفهاش الهدار مول القيل والقال
تيفهمها هذاك اللي يديه على قلبو
لما تيطيح صاحبو فأزمة .