الحر بالغمزة
كلام الليل
محمد صولة
قوات الهضرة هذا الأيام
على والو
وهااحنا مازالين
شحال تسنينا نديرو شي حاجة
نبنيوالخيمة تاعنا اللي بغينا
ونسقيوالطعام بمغرف وحدة
ساعة الوقت اخسر
وخسرو فيه الناس
إيه هذوك اللي على عينيك
تيشوفو غير بالجنب
وما عمرهم شافو توالنا
احنا اللي قادينا ليهم الطريق
وركبنا ليهم حتى الطروطوار
وغير لقاوها مصايبة كيف بغاو
وهما يدغدغو اعظامنا
ماتلينا قادين على كلام
مابغينا نتحاشمو مع حد
مات لينا الحوت والأحلام
وفاض الما اللي كان عاني بيه السد
وتقاضى الفهم اللي بغينا من زمان
ياك هذوك اللي هما هما
واحنا اللي هزنا الما
كيف بغيتي تغزل احلامك من خيوط البكا
كيف بغيتي تنقي خيالك وانت طايح فغيسة
كيف بغيتي تكون بحال بنادم ما ترد كلمتو ايلا شكا
كيف بغيتي تكون حلو عسل وانت مشرمل فهريسة
انت الحكا انت الحسكة
انت ماخيبك بتفرنيسة انت ليهم فريسة
واش شفت آش اوقع؟
واقيلة ماشفت والو
أنا اللي شفت ما يزا
قالو دارو هما شي حاجة
ويمكن باضت لالة دجاجة
الشارع اللي كان مجرح بالوسخ
وكان فيه اللعب الصغير والكبير
فرشوه بالنوارالمرشوش بريحة البلاستيك
بعضين تقياولسانهم وما بقا ليهم من مخ
وبعضين نزل عليهم الدق والدمير
واخرين استحلاو الدليك والهليك
هاك وارا
آرا وهاك
فيفتي فيفتي
اضحك ليا نضحك ليك
لاش البكا وسط الزحام
شد يديك واحذر عينيك
الكلام عليك
وانا هذا الكلام عياني
وكل صحابي خسرتهم
ياخسارتي فاصحابي اللي ولاويتباعو ويتشراو
منهم الشمس اللي ماولات بحال زمان
ومنهم القمرة اللي طفات باللي كان
هذا الهضرة بزاف عليا ياخويا
من كنت اصغير وانا براني
ولما كبرت ضاق بيا الحال
وبديت نحسب ونغوت
واحد
عشرة
عشرين
مية
ألف
مليون
وانا عارف باللي ماتيحسب غير المزلوط
ايوا ياك نجحت في الإمتحان
وخديت الباك
وغادي تكمل قرايتك وتولي شي حاجة
بحال شي ناس اللي قراولهيه
ويمكن تلقى راسك ياولدي معطل بديبلومك قدام البرلمان
علاش عليك
وليت تعرف تحسب
باركة عليك
وتكتب
حيت ايلا جات شي برية للدوار تقراها للقبيلة
راه الناس بحرا تتقلب على الخبز وصافي
وانت خصك تفك ليهم هذا الجدول اللي ما عرفو ليه
إيه واش شفت فين كنا وفين ولينا؟
........
.......
ماتحتاجش تبيع راسك
ماتحتاجش تشري ناسك
بحال لبارح
بحال ليوم
موهوم اللي يمشي حفيان على رجليه
ويتصور نفسو انسر طاير بجنحيه
حدك تمارررررررة
هز راسك من العز المغشوش
وخليك غادي على جوج بحال ديما
يمكن تربح وتغير حياتك الذميمة .
