الحر بالغمزة ...

الحر بالغمزة ...
مسافة على قد الشوف

محمد صولة
Sawla.mohamed@hotmail.com

بداية من مكان ما :
من قال بأن الأشياء التي تقع الآن حقيقية ؟ لنتصور أن الجميع يلعب دوره بالكامل بدون رتوش ولا زيادات، ماذا سيحصل؟ لاشيء، إذن ، لابد من ضحية ( أضحية)تقدم قربانا للآلهة ولو على حساب الشكل ، أما المضمون فلا أحد يبحث عنه، لأنه يرتبط بأصحاب الكروش اللي فيها العجينة، وشحال خصك يالعريان ؟ وفين غادي تبات يا البايت بلا عشا ؟ وتيكولو سيادنا الأولين : ماحدها تقاقي وهي عاد تتزيد فالبيض، وياك بعدة ، أنا ماخرجتش من روندتي ، سول بعدة هذوك اللي الليل وماطال وهما كالسين غير على تعمار الشوارج ، اسمحوا لي يا سادتي ، لأني مولع بالدارجة ، وأعتبر نفسي من طينة الأميين في أمة محمد صلى الله عليه وسلم ، أن أقول إلا ما أعرفه ، ولا أستبق العدو في الحرب ، لكي لايسميني غذرته، أنا كسائر بني البشر ، إنسان يقول ما يراه ولو كان في كف عفريت ، لذا سأقتحم خلوة البعض وأغني ، ياك بعدة ن وعاجبني راسي احسن من أخرين اللي خايفين على شي حاجة غادة تفلت ليهم من يديهم، أما أنا مارابح ماخاسر، من نهار اللي حطينا الشمل واحنا غير في المشاكل مع اصحابنا ، أما اللي كان ضدنا ولى هوحبيبنا وعزيزعلينا وما بغينا نغيروه .
حمير جدة :
تقاد المحراث مع الفلاح وقال ليه : اسمع يا ولد الناس ، والله وما تمضي السكة مزيان حتى نحرثك أنت براسك .
قال ليه الفلاح : إيلا قديت تحرث الصخر ها انت بدا وتشوف آش غادي يجرا ليك .
بدا المحراث كينبش في الأرض وتلفت قدامو ، ضحك وحك وراه ، وقال : اللي سميتو ولد امو يقرب لي هنا .
ما لقى غير حمير هو اللي حدر راسو وقال : أنا يا هذا غادي نفد ليك ما بغيتي من هذا النهار ، غير خلي عليك المحراث ، لحقاش هو صاحبي من زمان .
طلع للمحراث الخز والزوت للراس وبدا يكشكش : يا هذوك اللي لهيه ولا اللي هتا رانا معاكم تنهضر وانتما ضاربينها بطمة من زمان ، زعما تديروا غير اللي فراسكم ، يسحاب ليكم انتما اللي عارفين ، والله شي مرة حتى ندير اشرع يدي بيدي واللي ليها ليها .
هرب المحراث مللي سمع الهضرة ، وابقى غير المير هو اللي تيهرنط وحدو وحتى واحد ما داها فيه ، قال : واشداني لعند هذا الرهوط .
قال ليه المحراث : وسير تبول على جداك ياهذ االحمق ، راه ما بقى غير الخيش البيش .
ارجع الحمير مسكين للكوري وحدر راسو بحال ديما ودخل جواه وقال: ياك أنا غير حمار ، واش داني لهذا الفهامة اللي اكثر مني ، الحمار ديما حمار واخا يحيدوا ليع البردعة والشواري .
Stope خاسر :
شفت العور تيقاد الطريق للناس وهي تتسابق على والو .
شفت الأعرج تيجري مع سحت الليل والريح والله ما داو منولاحق ولا باطل .
شفت الأقرع عند الكوافورة تتمشط ليه شعرو، وكاتدير ليه كوبة ما ديراش .
شفت الحمق طايح نايض مع دري صغير سمحات فيه أموفراس الدرب.
شفت أنا اللي ما شافو حتى واحد فهذا الوقت بالذات ، شفت الكرة الأرضية واقفة فوق قرن ثور اعرج كيشوف في الباب د البوطوار بعين وحدة والثانية ديرها على اخزيت .
فران وقاد بحومة :
شكون قال يشري التعوريط فابور ؟
شكون قال مول المليح باع وراح ؟
شكون قال اللي خاف نجا ؟
شكون قال الحمية تتغلب السبع ؟
شكون قال إيلا عطاتك الأيام دير كتريام؟
شكون الهضرة عليك يا الحادر وذنيك ؟
شكون .......................................؟؟؟
خاتمة من ذاك الشي :
تصفيقات حارة وشاعلة عافية .
صراخ وضجيج وغوت وهراء وتمرغيد .
عناق وتبواس وتحايا وشكر و....
خاتمة ديال بالصح:
طاح الشعر لمولاه من فوق الراس
وهي تبان التعكيرة فوق الخنونة