الحربالغمزة ...

الحربالغمزة ...
خروب الدنيا
محمد صولة
Sawla.mohamed@hotmail.com
يا سبحان الله
كيف ما درت معاها
نلقاها عندي فالباب
ما كنت نتخيل
تجيني فصورة
شادها ناب وكلاب
قلت ليها : ليوم عيطت عليك عيطة
واش يمكن ليك تقبليها.
ضحكت وقلبت عينيها بحال ديما
وبحال الدري الصغير تململت وسرحت بلا عقل
آش نقول لما تتحلم وتتفيق في الصباح
وما تتلقى غير الدص
مرة شفت راسي أنا شي شخصية كبيرة
ومالي آش نكون؟
واش هما احسن مني زعما؟
غير حليت عينيا
صبحت على قادوس مخنوق
وكسدة مرمية في صندوق
وبرمة مخلطة بتراب وبرقوق
ونفاق مغطي السوق
وبكا مجنتر رشوق
غوت كبير اللي فهمت منومحروق
واحد شاد البوق
تيهدر بلا ميزان وداخل لكل الشبوق
في الناس شاد القشابة بالعما
في الرما والتحسان بلا ما
في الكياسة والسياسة والتهريج
ليوم غ دي نحول ليكم ، تيقول:
هاهو الخير مدفق يالقبيلة في الواد
وانتما ما بغيين ربح لينا
ياسبحان الله
اللي هدر على الحق يتسمى احمق
وفين عمركم شفتو الحق تيجي بالهداوة
الحق هو الله
وما يعطيك غير ذراعك وما قديتي تدير بافعالك
الحاصول
ماحدها تتقاقي وهي عاد تتزيد في البيض
اللي مزلك في شريط ومسلوق
هاذ السيد نسى السيدة
وبدل الشوفة
خذا جورنال مزوق
فيه غير هما
هذوك اللي على عينيه
وبدا يحلم يخرج لهيه بلا وقت
وآش لقى ؟
Jennifer Aniston
Drew Barrymore
Anne Krystel
Angelina Joli
Scarlette Johansson
Charlotte LeBon
Tylor Momsem
وهو يقلب الجورنال، مايلقى ثاني غير:
بريتني سبيرز
ليندسي لوهان
باريس هيلتون
ما اقشع مسكين والو
وهو اللي تيحلم اكثر من لقياس
شد حنكووغمض عينيه مزيان
واحلف حتى يراهن على شي زودياك
واخا يشم فيه غير ريحة الموج وما يجي منو.
حيران
وسط موج الوقت العاتي
حيران
والصبر دمر لي خلواتي
مجبور نسد الباب
يمكن يهدن لي ذاتي
داري دنيا
وقبري فيها ماتقدو سكراتي
قدست ايامي
ما لقيت فيها خيرللجايين من امواتي
ياخالق الكون
نجني من صهد نار الزحمة
عمر لي كاسي بفيض المحبة والرحمة
نترجاك كون عويني
وجاهك لي حكمة
لبسني ليمان
يبان البرهان
وتزول الغمة
حالي محال يتفادى
رزين النخوة والكلمة
الدنيا وجبة غرارة
واحنا فيها رحالة
من برا الله الله
وداخلها يمكن قتالة
اللي صبر ينال ما بغى
واللي ازرب عليه ميالة
الضيق فيها ممدود
وساحها ويدانو مثقالة
لاتعمر راسك بخروب الدنيا
يكفيك دق الرجالة.